Kya Bukhari Shareef Me Saari Ahadees Sahi Hai ? Sihah Sitta Ka Kay Matlab Hai ? (Roman Urdu)

 *Naaibe Mufti E Azam Hind, Shagirde Sadrushshariah, Faqihe Azam Hind, Sharihe Bukhari Mufti Shareeful Haqq Amjadi عليه رحمة اللّٰه القوى Farmaate Hai :*

*Muhaddiseen Ne Saikdon Kitaabe Likhi In Me Kuch Napaid Hogayi Aur Kuch Gumnaami Me Rahi, Allama Suyuti Ne Jam'ul Jawaami' Me 50 Se Zaid Kutube Ahadees Ki Nishandahi Ki Hai.*

*In Me Sab Se Zyada Shohrat Aur Maqbooliyyat In 6 Kitaabon Ko Haasil Huwi : 1) Jaami Sahi Bukhari, 2) Sahi Muslim, 3) Jaami' Tirmizi, 4) Sunane Abi Davood, 5) Nisai, 6) Ibne Maaja.*

*In Ko Sihah Sitta Bhi Kehte Hai, In Par Sihaah Sitta Ka Itlaaq Aam Urf Ki Bina Par Hai, Baz Muhaddiseen Ne Ibne Maja Ke Bajaye Motta Imaam Maalik Ko Sihah Sitta Me Daakhil Maana.*

( Nuzhatul Qari, Jild 1, Safha 104-105, Fareed Book Stall, Urdu Bazar, Lahore. )

*Aage Farmaate Hai :*

*Sihaah Sitta Ka Matlab Ye Nahi Ke In Ki Tamaam Ahadees Sahi Hai, Inme Zaeef Balke Mauzoo Bhi Hai(!) In Ko Siha Sitta Is Liye Kehte Hai Ke In Me Ba Nisbate Deegar Kitaabon Ke Zaeef Ahadees Kam Hai, In Ki Aksar Gaalib Sahi Hai.*

*In Sab Me Jis Ko Sab Par Sehat O Quwwat Ke Etebaar Se Fauqiyyat Hai Woh Jami' Sahi Bukhari Hai.*

( " Safha 105 )

*Aage Farmaaya :*

*Woh Rawaat ( Raavi ) Jin Se Sirf Imaam Bukhari Riwayat Karte Hai Woh 630 Hai, In Me Sirf 80 Zaeef Hai, Aur Jin Se Imaam Muslim Riwayat Karte Hai Woh 620 Hai Jin Me 160 Zaeef Hai.*

( " Safha 105 )

*Aage Farmaya :*

*Majrooh Raavi ( Woh Raavi Jin Par Jarah Hai, Un ) Se Imaam Bukhari Ne Bohut Kam Riwayat Ki Hai Imaam Muslim Ne Bohut Zyada Ki Hai.*

( " Safha 106 )

*Aur Ek Maqaam Par Farmaaya :*

*Aaj Tak Hadees Me Jitni Kitaabe Likhi Gayi Bila Istisna Sab Me Sahi Ke Saath Zaeef Ahadees Bhi Darj Hai, Is Se Sahi Bukhari Bhi Mustasna Nahi, Doosri Kitaabon Ke Ba Nisbat Is Me Zaeef Hadeese Kam Hai.*

( " Safha 144 )

*Ash Kitaab Ka Ye Matlab Nahi Ke Imaam Bukhari Ne Jo Kuch Likha Hai Woh Sab Sahi Wa Haqq Hai, Jis Ki Tafseel Is Kitaab Me Jagah Jagah Mazkoor Hogi, Imam Bukhari Se Is Kitaab Me Jagah Jagah Laghzish Huwi Hai.*

( " Safha 144-145 )

*Aage Farmaaya :*

*Bukhari Me Aise Raawion Ki Tadaad Bohut Kam Hai Jo Bad Aqida Gumraah The Jaise Jahmi, Qadri, Rafizi, Naasibi, Khariji, Mutazili.*

( " Safha 145 )

*Aage Farmaya :*

*Zaeef Raavion Se Riwayat Ke Ilawah Imaam Bukhari Se Rawion Ke Naam, Un Ki Waladiyyat Me Laghzish Hogayi Hai.*

( " Safha 147 )