15 Shaban Ke Baare Me Jhooti Aur Jahalat Bhari Baatein ( Ghair Muqallideen Ko Jawab )

 *1) Quran Ka Nuzool :*

Shabe Barat Manaane Walon Par Eteraz Karte Huwe Koyi Kehte Hai Ke : Quran Laylatul Qadr Mai Nazil Hua Jo Ramzaan Mai Aati Hai, See Surah Dukhan Ayah 3 And Surah Qadr, Ayah 1.

*Ham Kehte Hai :* Yahi Baat Hamare Awaam O Khawaas Me Mashhoor O Maroof Hai Aur Ham Bhi Yahi Kehte Hai Ke Qurane Majeed Shabe Qadr Me Nazil Huwa, Kisi Qabile Etemad Se Aaj Tak Sunne Me Na Aaya Jo Kehta Ho Ke Qurane Pak Shabe Barat Me Nazil Huwa Hai.

*2) Aasmaane Duniya Ki Taraf Nuzool :* 

Kehte Hai : Allah Saal Ki Har Raat Mai Pehle Aasman Per Aate Hai Aur Duaa Qubool Kerte Hai, See Hadith Of Bukhari And Muslim. ( Wa Lihaza Shabe Barat Ki Koyi Asl Nahi )

*Correction :* Pehle To Hadees Me Jo Lafz Istemaal Huwa Usi Ke Mutabiq Tarjama Kiya Jaata To Behtar Tha, "Naazil" Ya "Nuzool" Ke Alfaaz Ke Saath. Hadees Me Maujood "Nuzool" Ke Alfaaz Par Ulamaye Deen Ne Khulasatan Kaafi Likkha Hai, Behre Haal Woh Ek Alag Mauzoo Hai.

Ye Baat Sahi Hai Ke Har Raat Ke Mutalliq : Nabiyye Akram ﷺ Ne Farmaya : Hamara Rab تبارك و تعالى Har Raat Aasmaane Duniya Ki Taraf Naazil Hota Hai Jab Raat Ka Aakhri Tihaayi Hissa Baaqi Reh Jaata Hai, Woh Farmata Hai : Kaun Mujh Se Dua Karta Hai Ke Mai Us Ki Dua Qabool Karu, Aur Kaun Mujh Se Suwal Karta Hai Ke Mai Us Ko Ata Karu Aur Kaun Mujh Se Maghfirat Talab Karta Hai Ke Mai Us Ki Maghfirat Kardun.¹

( Sahi Bukhari, Kitab : 19 ( Tahajjud ), Baab : 14, Page : 277, Hadees : 1145, Dar Ibne Kaseer, Beirut. )

Ye Riwayat Bukhari Me Mazeed 2 Maqamat Par Hai, Baqiyyah Donon Jagah Bhi Yahi Mazmoon Hai.

( Sahi Bukhari, Kitab : 80, Baab : 14, Page : 1577, Hadees : 6321. )

( Sahi Bukhari, Kitab : 97 ( Tauheed ), Baab : 35, Page : 1850, Hadees : 7494. ) 

Aur Sahi Muslim Me Bhi Aise Hi Hai Ke : Hamara Rab تبارك و تعالى Har Raat Ke Aakhri Tihayi Hisse Me Aasmaane Duniya Ki Taraf....³

( Sahi Muslim, Kitab : Salatul Musafireen, Baab : 132/24, Page : 347, Hadees : 758 ( 1656 ), Darul Fikr, Beirut. )

Baqiyyah Mazmoon Bukhari Hi Tarah.

Aur Ye Baat Bhi Sahi Hai Ke Isi Tarah Ki Fazilat Shabe Barat Ke Mutalliq Bhi Warid Hai, Siha Sitta Me Is Hawale Se Ahadees Maujood Hai, Sunane Tirmizi Me Hai : 

1) Nabiyye Aqdas ﷺ Ne Farmaya : Be Shak Allah عزوجل Nisf Shabaan Ki Shab Ko Aasmaane Duniya Ki Taraf Naazil Hota Hai, Aur Qabila Kalb Ki Bakriyon Ke Baalon Ki Tadaad Se Zyada Logon Ke Gunaah Muaaf Kardeta Hai.²

( Sunane Tirmizi, Kitab : 5 ( Saum ), Baab : 39, Page : 141, Hadees : 739, Baitul Afkaar. )

Jab Ek Hi Tarah Ke Fazail Ahadees Me Ek Se Zaid Cheezon Ke Mutalliq Manqool Ho To Ek Ko Lekar Doosre Ko Jhoot Kehna Sarasar Zulm Hai, Jabke Yahan Baat Wazeh Bhi Hai Ke : Aur Raaton Ke Aakhri Hisse Me Ye Karam Nawazi Hoti Hai Magar Shabe Barat Ki Raat Shuru Se Hi.⁴

Aur Phir Jo Maghfirat Ki Bisharat Hai Usko To Side Kardiya Gaya Aadhi Baat Bata Kar, Goya Ye Tassur Dene Ki Na Mumkin Koshish Hai Ke Jab Ye Fazilat Har Raat Ke Liye Hai To Is Raat Ki Koyi Khusoosiyyat Hai Hi Nahi, Jab Ke Ye Sarasar Jahalat Hai Ya Bughz O Inad.

Siha Sitta Me Se Sunan Ibne Maja Me Hai : 

2) Nabiyye Kareem ﷺ Ne Farmaya : Be Shak Allah سبحانه و تعالى Nisf Shabaan Ki Shab Ko Mutawajjeh Hota Hai Aur Tamaam Makhlooq Ko Bakhsh Deta Hai, Ma Siwa Mushrik Aur Keena Parwar Ke.⁵

( Sunan Ibne Maaja, Kitaab : 5, Baab : 191, Page : 247, Hadees : 1390, Maktabatul Ma`arif, Riyadh. )

In 2 Ke Ilawa Bhi Kayi Ahadees Shabe Barat Ke Mutalliq Hadees Ki Kitabon Me Milti Hai, Ab In Ahadees Par Ye Eteraz Karna Ke Ye 'Hadeesein Zaeef Hai Is Wajah Se Qabile Qabool Nahi', Dar Asl Apne Jahil Hone Ka Elan Karna Hai.

Pehli Baat To Ye Hai Ke Koyi Fazilat Hadees Me Maujood Ho Ab Agar Woh Zaeef Riwaayaat Ek Nahi Chand Ho To Phir Woh Hadees Zaeef Nahi Rehti, Yahi Wajah Hai Ke Wahabiyon Ke Muhaddis Albani Ne Apni Silsilaye Ahadeese Sahiha Me Shabe Barat Ki Fazilat Waali Ahadees Ke Peshe Ibne Maaja Ki Riwayat Naql Karne Ke Bad Kaha Ke : Ye Hadees Sahi Hai, Ise Sahaba Ki Ek Jamaat Ne Mukhtalif Turq Se Riwayat Kiya Hai.

( Silsilatul Ahadees As-Sahiha, Vol : 3, Page 135, Hadees : 1144, Maktabatul Ma`arif, Riyadh. )

Aur Aage Shabe Barat Ki Fazilat Par Maujood 8 Riwayat Ke Mutalliq Tafseelan Kalam Kiya, Aakhir Me Bhi Saari Narrations Ki Wajah Se Nisf Shaban Ki Fazilat Ko "Bila Shak Sahi" Qaraar Diya, Phir Is Fazilat Ka Inkar Karne Walon Ka Radd Kiya.

Doosri Baat Ye Hai Ke Fazail Me Zaeef Hadees Bhi Qabile Qabool Hoti Hai, Imam Navavi رحمة الله تعالى عليه Farmate Hai : Muhaddiseen O Fuqaha Waghairahum Ulama Ne Farmaya Ke Fazaile Aamal Aur Nek Baat Ki Targheeb Aur Buri Baat Se Khauf Dilaane Me Hadeese Zaeef Par Amal Jaayiz O Mustahab Hai, Jabke Mauzoo  ( Yani Jhooti ) Na Ho.⁶

( Kitabul Azkaar, Page 8, Maktabah Darul Bayan. Beirut. )

Isi Se Ek Milti Julti Riwayat Imaam Tabarani Riwayat Karte Hai :

3) Huzoor ﷺ Ne Farmaya : Allah تعالی Shabe Baraat Me Apni Makhlooq Ki Taraf Tawajjoh Farmaata Hai Aur Mushrik Aur Mushahin ( Keena Parwar ) Ke Siwa Sab Ki Maghfirat Farma Deta Hai.⁷

( Mujame Ausat, Vol : 7, Page : 36, Riwayat : 6776, Darul Haramain, Misr. )

Is Ko Imaam Ibne Hibban Ne Bhi Apni "Sahi Ibne Hibban" Me Riwayat Kiya. To Unke Nazdeek Ye Hadees Sahi Daraje Ki Hai.

( Dekhen : Al-Ihsan Bitaqreeb Sahi Ibne Hibban, Vol : 12, Kitaab : 44, Baab : 5, Page : 481, Hadees : 5665, Resalah, Beirut. )

Aur Is Ke Mutalliq Imaam Ibne Hajar Makki Bhi Farmate Hai Ke : Is Riwayat Ke Raawi Siqa Hai.

( Majmauzzawaid, Vol : 8, Page : 77-78, Kitabul Adab, Baab : 76, Zere Riwayat : 12960, Ilmiyah, Beirut. )

Ab To Wawela Nahi Karna Chaahiye Ke Shabe Barat Ki Fazilat Sahi Hadees Se Sabit Nahi.

*3) Rizq Waghaira Ki Taqseem :*

Kehte Hai : ( Rizk, Umr, Maut Ka Waqt Likkha Jaana ) Ye Sare Kaam Laylatul Qadr Mai Hote Hai Jo Ramzaan Mai Aati Hai, See Surah Dukhan Ayah 4-5. ( Yani Ke Shaban Ki Raat Me Ye Nahi Hote )

*Ham Kehte Hai :* Eteraz Karne Wale Par To Tajjub Hi Karna Chaahiye Ke Ye Eterazaat Aise Likkhe Jaise Shaban Ki Raat Ke Mutalliq Baatein Hamne 14vi Sadi Me Ghar Baithe Baithe Gadhi Ho!,  Agar Aisa Hota To In Sabhi Baaton Ko Jhoot Kehna Baja Tha, Magar Maloom Hona Chaahiye Ke Is Tarah Ki Baatein Riwaayaat Se Bayan Kiye Jaate Hai.

Pehle Qurane Azeem Ki Suraye Dukhan Ki Aayat 4-5 Ka Tarjama Mulahaza Ho :

*"Us Raat Me Har Hikmat Waala Kaam Baant Diya Jaata Hai, Hamare Paas Ke Hukm Se, Beshak Ham Hi Bhejne Wale Hai."*8

Aur Ab Shabe Baarat Ke Mutalliq Riwaayaat Mulahaza Ho :

Hazrate Aayisha Siddiqah رضى اللّٰه تعالى عنها Se Riwayat Hai Ke Nabiyye Kareem ﷺ Shabaan Ka Poora Mahina Rozah Rakhte The, Maine Is Baare Me Aap Se Poocha, Farmaya : Allah تعالی Isi Raat Saal Bhar Tamaam Marne Walon Ke Naam Likh Deta Hai, Mai Pasand Karta Hu Ke Jab Mujhe Maut Aaye To Mai Roze Se Hu.⁹

( Musnade Abu Yala, Vol : 8, Page : 311-312, Hadees : 4911, Darul Mamoon, Beirut. )

Imam Bukhari Ke Ustaz Imaam Ibne Shaiba Ne Hazrate Asa Bin Yasar رحمة اللّٰه علیه Se Riwayat Naql Karte Hai Ke : Rasoolullah ﷺ Shabaan Se Badh Kar Kisi Mahine Me Zyadah Roze Nahi Rakkha Karte The. Is Ki Wajah Ye Hai Ke Saal Bhar Me Jinhe Maut Aani Hoti Hai Un Ki Mautein Is Raat Likh Di Jaati Hai.¹⁰

( Al-Musannaf, Kitabe Siyaam, Vol : 6 Baab : 115, Page : 336-337, Riwayat : 9857, Dare Qurtubah, Beirut. )

In Do Riwayaat Ko In Kitabon Par Tahqeeq Karne Walone Zaeef Kaha, Magar Is Qism Ki Aur Bhi Riwaayaat Milti Hai. ( Aur Shaban Ke Mutalliq Aisi Riwayat Bhi Hai Jisme Ye Mazmoon Hai Ke Is Me Aamaal Uthaye Jaate Hai. )

Behre Haal, Is Muamle Me Khulasa Ye Hai Ke : Ye Faislah 15 Shaban Ki Raat Hota Hai, Aur Shabe Qadr Me Woh Faislah Un Firishton Ke Hawale Kardiya Jaata Hai Jinhone Is Faisle Ke Mutabiq Amal Karna Hota Hai.¹¹ Imaam Baghavi Ne Apni Tafseer Me Ek Sahabi Se Manqool Isi Tarah Ke Farmaan Ko Naql Kiya.

( Dekhe Tafseere Baghavi, Vol : 7, Safha 227, Suraye Dukhaan, Zere Aayat : 4-5, Dare Taibah, Riyadh. )

*4) Roohon Ka Ghar Aana :*

Kehte Hai - Inteqaal Ke Baad Sabhi Roohen Ya To Illeyeen Ya Sijjen Mai Hoti Hai Aur Qayamat Tak Waha Se Bahar Nahi Aa Sakti - See Surah Muminoon Ayah 99-100. ( Goya Is Raat Mai Murdo Ki Roohen Apni Family Se Mulaqat Kerne Aane Ki Baat Quran Ke Khilaf Hai )

*Correction :* Suraye Muminoon Ki Aayat 99-100 Me Irshade Baari Hai :

*"Yahan Tak Ke Jab Un Me Kisi Ko Maut Aati Hai To Kehta Hai Ke Ae Mere Rab Mujhe Wapas Lautade. Jis Duniya Ko Maine Chorh Diya Hai Shayad Ab Us Me Kuch Nek Amal Karlu. Hargiz Nahi! Ye To Ek Baat Hai Jo Woh Keh Raha Hai Aur Un Ke Aage Ek Rukawat Hai Us Din Tak Jis Din Woh Uthaaye Jaayenge."*¹²

Aur Isi Tarah Suraye Munafiqoon Aayat 9-11 Me Irshaad Hota Hai Ke :

*"Ae Iman Waalo! Tumhare Maal Aur Tumhari Aulaad Tumhe Allah Ke Zikr Se Ghafil Na Karde, Aur Jo Aisa Karega To Wahi Log Nuqsaan Uthaane Wale Hai. Aur Hamare Diye Huwe Rizq Me Se Us Waqt Se Pehle Pehle Kuch Hamaari Raah Me Kharch Karlo Ke Tum Me Kisi Ko Maut Aaye To Kehne Lage, Ae Mere Rab Tu Ne Mujhe Thodi Muddat Tak Kyun Mohlat Na Di Ke Mai Sadqa Deta Aur Saliheen Me Se Hojaata. Aur Hargiz Allah Kisi Jaan Ko Mohlat Nahi Dega Jab uska Wadaa Aa Jaaye Aur Allaah Tumhare Kaamon Se Khabardaar Hai."*¹³

Sunane Tirmizi Me Hai, Hazrate Abdullah Ibne Abbaas رضی اللّٰه تعالی عنهما Ne Farmaya : Jis Ke Paas Itna Maal Ho Ke Woh Baitullah Shareef Ka Haj Karne Pahunch Sakta Ho Ya Us Par Zakaat Farz Ho, Is Ke Bawajood Woh Haj Na Kare Ya Zakaat Na De To Woh Marte Waqt Duniya Me Wapasi Ka Suwal Karega. Ek Shakhs Ne Kaha : Ae Abdullah Ibne Abbaas! رضى اللّٰه تعالى عنهما Aap Allah تعالى Se Dare, Duniya Me Wapasi Ka Suwaal To Sirf Kuffar Karenge ( Aur Aap Musalmaanon Ke Baare Me Aisa Keh Rahe Hai ) Aap Ne Farmaya : Mai Iske Baare Me Tumhare Saamne Qurane Majeed Ki Aayaat Padhta Hu Chunanche Aapne Suraye Munafiqoon Ki In 3 Aayaat Ki Tilawat Farmayi.¹⁴

( Sunane Tirmizi, Kitaab : 43 ( Tafseer ), Baab : 63, Page : 525, Riwayat : 3316 & 3317, Baitul Afkaar. )

Suwal Ye Hai Ke Isme Kahan Roohon Ke Ek Hi Maqaam Par Rehne Ka Farmaya Gaya ? Kis Cheez Ko Kis Cheez Se Joda Jaaraha Hai ?.

Jabke Mumin Ki Roohon Ka Jahan Chaahe Jaana Riwaayaat Se Sabit Hai :

Hazrate Abdullah Ibne Amr رضی اللّٰه تعالی عنه Farmate Hai : Beshak Duniya Kaafir Ki Behasht Aur Musalman Ka Qaid Khaana Hai, Jab Musalmaan Ki Jaan Nikalti Hai To Us Ki Misaal Aisi Hai Jaise Koyi Shakhs Zindaan ( Qaid Khaane ) Me Tha Ab Aazad Kardiya Gaya To Zameen Me Gasht Karne Aur Ba Faraghat Chalne Phirne Laga.¹⁵

( Kitabuzzuhd Abdullah Ibne Mubarak, Baab : Talabe Halal, Safha 486, Riwayat : 552, Darul Meraaj, Riyadh. )

Is Kitab Par Muhaqqiq Ne Is Ki Sanad Ko Hasan Qaraar Diya.

Imam Ibne Abi Shaiba Ne Riwayat Kiya, Yahi Sahabi Farmate Hai : Duniya Musalman Ka Qaid Khaana, Aur Kaafir Ki Behasht, Jab Musalmaan Marta Hai Uski Raah Khol Di Jaati Hai Ke Jahan Chaahe Jaaye.¹⁶

( Al-Musannaf, Vol : 19, Kitab : 36 ( Zohd ), 22 - Kalam Abdulah Ibne Amr, Page : 225, Riwayat : 35867, Dar Qurtuba, Beirut. )

Hazrate Salman Farsi Aur Hazrate Abdullah Bin Salaam رضی الله تعالی عنهما Baham Mile, Ek Ne Doosre Se Kaha Agar Mujh Se Pehle Inteqal Karo To Mujhe Khabar Dena Ke Wahan Kya Pesh Aaya, Kaha Kya Zinde Aur Murde Bhi Milte Hai ? Kaha : Han, Musalman Ki Roohein To Jannat Me Hoti Hai, Unhe Ikhtiyaar Hota Hai, Jahan Chaahe Jaayen.¹⁷

( Shuabul Iman, Vol : 2, Page : 489, Riwayat : 1293, Maktabaye Rushd, Riyadh. )

Is Ke Muhaqqiq Ne Kaha Ke Is Riwayat Ki Sanad Me Koyi Haraj Nahi.

Imaam Malik رحمة اللّٰه علیه Farmate Hai :  Muminon Ki Arwaah Aazaad Hoti Hai Jahan Chaahti Hai Jaati Hai.¹⁸

( Al-Istizkaar Imaam Ibne Abdul Bar, Vol : 8, Page : 354, Kitabul Janaiz, Baab Jamiul Janaiz, Zere Hadees : 525, Raqam : 11850, Dar Qateeba, Beirut. )

Imaam Hakeem Tirmizi Farmate Hai : Kuch Arwaah Barzakh Me Ghoomti, Duniya Aur Firishton Ke Ahwaal Ka Mushahadah Karti Hai Aur Aasmaan Me Logon Ke Ahwaal Ke Mutalliq Guftugoo Karti Hai.¹⁹

( Nawadirul Usool, Vol : 1,  Page : 670, Asl : 169, Zere Hadees : 920, Maktabah Imam Bukhari, Misr. )

Imaam Qurtubi Farmate Hai : Ghaire Shuhada Ki Arwaah ( Roohein ) Jannat Me Nahi Hoti Balke Kabhi Aasmaan Aur Kabhi Qabron Ke Kinaron Par Hoti Hai, Aur Ye Bhi Kaha Gaya Hai Ke Woh Bila Nagha Har Jumuah Apni Qabron Par Aati Hai.²⁰

( Tazkiratul Mauta, Page : 430, Makatabah Darul Minhaaj, Riyadh. )

Is Par Aur Bhi Bohut Naql Kiya Jasakta Hai Magar Yahi Kaafi Hai, Is Se Ye Baat Bilkul Wazeh Hojati Hai Ke Musalmaanon Ki Roohein Duniya Me Qabron Waghaira Par Aasakti Hai, Al Mukhtasar "Woh Jahan Chaahe Jaaye", Is Ko Quran Ke Khilaaf Bataana In Sab Buzurgon Ko Kaafir Qaraar Dena Hai, Allah Ki Panaah!.

To Jab Ye Sabit Hogaya Ke Roohon Ka Qabron Waghaira Par Aana Mumkin Hai, Iski Asl Maujood Hai To Koyi Shabe Barat Ke Bare Me Aisi Baat Kahe Ke Roohein Gharon Par Aati Hai, To Isme Sharan Haraj Hi Kya Hai, Baz Purani Kitabon Me Is Tarah Ki Baatein Maujood Hai Ke Roohein Apne Gharon Par Aati Hai Shabe Barat Waghaira Khusoosi Mawaqe Par. Roohon Ke Ghar Aane Ki Baat Aisi Nahi Ke Jiske Manne Se Koyi Islam Se Hi Nikal Jaaye Aur Na Hi Ye Aisi Baat Hai Ke Jiske Na Maanne Se Kisi Ke Islam Me Farq Aaye, Wa Lihaza Baal Ki Khaal Nikalne Se Ijtinaab Kiya Jaaye.

*5) Shabe Barat Ki Raat Me Namazein :*

Kehte Hai : Ye Jhoot Hai Is Raat Ki Koi Bhi Khas Namaz Ya Zikr Kis Bhi Sahih Hadees Se Sabit Nahi Hai Aisa Kerna Bidaat Mai Shumar Hoga.

*Correction :* Agar Namazein Padhne Ko Koyi Farz O Wajib Samjhe Ya Kahe To Woh Ghalat Karta Aur Kehta Hai, Ya In Is Raat Ko Fixed Rakaat Me Namazein Padhne Ko Hukme Qurani Ya Nabiyye Paak ﷺ Ka Hukm Bataata Hai To Galat Karta Hai, Magar Koyi Aisa Nahi Karta, Bas Is Raat Ki Khaas Fazilat Hai Wa Lihaza Khaas Taur Pe Ibadat Ka Ehtemam Kiya Aur Karwaya Jaata Hai, Khaas Namazein Jaise Eid O Baqr Eid Ke Liye Muqarrar Hai Us Andaz Me Is Raat Ki Namazon Ko Nahi Samjha Jaata, Balke Nafl Samajh Kar Hi Namazein Padhi Jaati Hai, Taake Is Raat Ki Fazilat Hasil Ho, Jab Ye Sabit Hogaya Ke Is Raat Ki Fazilat Me Hadeesein Hai Aur Un Par Amal Mustahab Hai To Is Raat Me Nek Aamal Baja Laane Me Bhi Koyi Haraj Nahi.

Imam Shafee رحمة الله عليه Farmate Hai : Hame Ye Riwayat Pahunchi Hai Ke 5 Raaton Me Duayein Khusoosi Taur Par Qabool Hoti Hai, 1) Jumeraat 2) Eidul Azha 3) Eidul Fitr 4) Maahe Rajab Ki Pehli Raat Aur 5) Nisf Shabaan ( Shabe Baraat ) Ki Raat.²¹

Aur Farmaate Hai : In Raaton Me Amal Karne Ke Baare Me Jo Kuch Bhi Bayan Kiya Gaya Hai Mai Use Bohut Pasand Karta Hu, Albattah In Raaton Me Ibadat Karna Farz Nahi Samajhta.²²

( Kitabul-Ummu, Vol 2, Page : 485-486, Kitab : 5 ( Salatul Eidain ), Baab : 2 ( Eidain Me Ibadat ), Raqam : 492 & 494, Darul Wafa. )

Agar Is Raat Ki Ibadat Ka Makhsoos Karna Bidat, To Imaam Shafaee Kya Thehre ? Aur Shak Nahi Ke Dua Ibadat Hai, Aur Namaz Me Bhi Duayein Hoti Hi Hai.

Allama Ibne Rajab Hambali Likhte Hai : Ahle Shaam Ke Tabaeen Masalan Hazrate Khalid, Hazrate Mak'hool Aur Hazrate Luqmaan Waghairahum Nisf Shabaan Ki Raat Ki Tazeem Karte The Aur Is Me Ibadat Ki Koshish Karte The, Aur Logon Ne Un Se Nisf Shabaan Ki Fazilat Aur Tazeem Me Riwaayaat Suni.²³

( Lataiful Ma`arif, Wazaife Shehare Shaban, Majlise Saani, Zikre Nisf Shaban, Page : 263, Dar Ibne Kaseer, Beirut. )

Aur imam Baihaqi Ne Hazrate Mak'hool رحمة اللّٰه عليه Se Shabe Barat Ki Fazilat Riwayat Bhi Ki Hai, Jisme Hazrate Mak'hool Sunan Ibne Maaja Ki Hadees Me Bayan Ki Gayi Fazilat Ko Bayan Karte Hai. ( Jisme Farmaya Gaya Ke Allah تعالی Is Raat Makhlooq Par Khusoosi Tawajjoh Farmate Hai Aur Tamam Makhlooq Ko Bakhsh Deta Hai Siwaye Mushrik Aur Keena Parwar Ke. )

( Dekhen : Shuabul Iman, Vol : 5, Page : 358, Riwayat : 3549, Maktabaye Rushd, Riyadh. )

Is Kitab Par Tahqeeq Karne Wale Muhaqqiq Ne Is Ke Saare Raviyon Ko Siqa Qaraar Diya, Yani Sanad Ke Etebar Se Ye Qaul "Sahi" Hai.

*6) Shabe Baraat Ka Roza :* 

Kehte Hai : Ye Bhi Kisi Sahih Hadees Se Sabit Nahi Hai, 15 Shaban Ko Khas Kar Ke Roza Rakhna Bidaat Hai.

*Correction :* Shabe Barat Ka Rozah Deegar Dinon Ki Tarah Nafli Hai, Rakkha Jaaye To Sawab Milega, Kisi Makhsoos Waqt Me Koyi Ibadat Khaas Karna Bidat Kaise Hai ? Kya Is Baab Me Quran O Hadees Me Mana Kiya Gaya Hai Ya Apne Naye Usool Deen Me Invent Karke Khud Bidat Ki Raah Par Daudne Me Lage Hai ?.

Sahi Bukhari Me Hai : Hazrate Abdullah Bin Masood رضى اللّٰه تعالى عنه Har Jumeraat Ko Logon Ke Saamne Waz Karte The.²⁴

( Sahi Bukhari, Kitab : 3 ( Ilm ), Baab : 12, Page : 30, Hadees : 70, Dar Ibne Kaseer, Beirut. )

Ab Bhi Koyi Kahe Ibadat Kisi Khaas Din Ke Liye Muqarrar Karna Bidat Hai ? Kya Waz Karna Aur Jumeraat Hi Ko Karna Ibadat Ko Makhsoos Karna Nahi ? Yahan Se Ye Masalah Clear Hogaya Ke Agar Aisa Karna Bidat Hota To Hazrate Abdullah Bin Masood Aisa Hargiz Na Karte.

*7) Shabe Barat Qabristan Jaana :*

Kehte Hai : 15 Shaban Ki Raat Mai Khas-kar Kabristan Jana Bidaat Hai. ( Ye Bhi Kisi Sahi Hadees Se Sabit Nahi )

*Correction :* Jo Riwayat Shabe Barat Ki Fazilat Me Sunane Tirmizi Ki Pesh Ki Gayi Woh Us Riwayat Ka Akhri Hissa Tha, Jabke Us Riwayat Ke Shuru Me Hai Hi Ye Ke :

Sayyida Aayisha رضى اللّٰه تعالى عنها Farmaati Hai Ke : Maine Ek Raat Rasoolullah ﷺ Ko Gum Paaya Dekha Ke Aap Jannatul Baqi Me The....²⁵

( Sunane Tirmizi, Kitab : 5 ( Saum ), Baab : 39, Page : 141, Hadees : 739, Baitul Afkaar. )

Aur Imam Navavi Ka Qaul Guzra, Zaeef Hadees Par Amal Karna Bila Shubah Jayiz Hai, Jisko Najayiz Bana Liya Gaya Hai.

*8) Muafi Maangna :* 

Kehte Hai : Maafi Naama Messages Forward Karna. Ye Tareeqa Galat Hai. Qusoosan Is Din Ko Mafi Mangne Ki Na Koi Afzaliyat Hai Na Ye Tareeqa Sunnat Se Saabit Hai. Humse Jab B Galati Hui Tab Hi Maafi Mangna Chahye, Milke Aur Poore Dil Se. Lekin Dekha Ja Raha Hai K Maafi Ko Khel Jaisa Bana Lia Gaya Hai Aur Har Kisi Ku, Kayi Aise Logo Ko Bhi Bheja Ja Raha Hai Jinse Na Kabhi Mulaakaat Hui Na Jaan Pehchaan. Ye Bilkul Hi Ghalat Tareeqa Hai.

*Correction :* Agar Ye Baat Tai Kardi Jaaye Ke Jo Cheez Sunnat Se Sabit Nahi Woh Karna Galat To Hamare Beshumaar Kaam Ruk Jaaye, Riwayat Jo Guzri Usme Chunke Keena Rakhne Walon Ki Maghfirat Na Hone Ke Hawale Se Farmaya Gaya, Is Wajah Se Muafi Maangi Jaati Hai, Albattah Ye Zaroor Hai Ke Agar Kisi Ko Muafi Maangna Zaroori Ho To Sirf Messages Ke Zariye Rasm Ada Nahi Karna Chaahiye, Balke Haqiqatan Jo Taqaze Hai Unko Poora Karna Chaahiye. Waise Shukr Hai Ke Yahan Bhi Bidat Na Kehdiya Gaya.

*9) Deen Mukammal Hochuka Hai :*

Kehte Hai : Deen Mukammal Ho Chuka Hai Isme Kisi Bhi Ibaadaat Ko Add Kerna Ya Badlav Kerna Bid'at Hai. Allah Ne Ussi Deen Ko Pasand Kiya Hai Ye Elan Bhi Kar Diya Ab Is'ke Baad Is Deen Mei Koi Khushi Ya Gham Ko Le Aye To Allah Us Deen Ko Na Pasand Karega Aur Us'ke Karne Wale Ko Sazã Bhi Dègã.

*Correction :* Deen Mukammal Zaroor Hogaya Hai, Koyi Naye Ahkaam Aur Halaal O Haraam Ke Masail Add Nahi Hosakte, Aur Shabe Barat Ko Manaane Ke Mutalliq Ye Kehna Waise Bhi Durust Nahi Ke Is Raat Ki Fazilat Ahadees Se Sabit Hai, Hamne Koyi Naye Se Nahi Banaayi. Aur Bidat Ki Baat Karte Karte Khud Bidat Ka Irtikaab Kardiya Gaya, Qurane Kareem Ki Ayat Bayan Karke Neeche Apni Mani Maani Izafat, Aur Apni Taraf Se Ek Naya Usool Bana Kar Use Allah تعالى Ki Taraf Mansoob Karne Se Badh Kar Bhi Kya Koyi Bidat Hai ?.

*10) Bidat ke Mutalliq Hadees :*

Hadees Naql Ki Gayi Ke : 

*"Har Bidd'at Gumrahi Hai, Har Gumrahi Jahannum Me Lekar Jayegi".*

( Sunane Nisayi, Kitab : 19 ( Eidain ), Baab : 22, Page : 455, Hadees : 1578, Resalah Publishers, Beirut. ) ( Is Riwayat Par Bukhari Wa Muslim Aur Tirmizi Ke Hawale Likkhe Gaye The, Exact Jin Alfaaz Ke Saath Hadees Naql Ki Gayi Siha Sitta Me Se Sirf Ye Nisayi Hi Me Mujhe Mil Saki, Baaqi Bukhari, Muslim, Tirmizi, Abu Davood Aur Ibne Maja Me Exact Is Tarah Ki Riwayat Mujhe Na Mil Saki Han Sirf Pehla Hissa "Har Bidat Gumraahi Hai" Sahi Muslim, Sunane Abu Davood Aur Sunan Ibne Maja Me Maujood Hai. )

Imam Ibne Hajar Asqalani Ne Isi Tarah Ki Ek Hadees Ke Tehat Naql Kiya Ke : Imam Shafaee رحمة اللّٰه عليه Farmate Hai : Bidat Ki 2 Qismein Hai, Bidate Mahmooda ( Acchi Bidat ) Aur Bidate Mazmoomah ( Buri Bidat ), Pas Jo Bidat Sunnat Ke Muwafiq ( Mutabiq ) Ho Woh Mahmood ( Acchi ) Hai, Aur Jo Bidat Sunnat Ke Mukhalif Ho Woh Mazmoom ( Buri ) Hai.

( Aur Likhte Hai Ke ) Imam Baihaqi Ne Imam Shafaee Se Riwayat Ki Hai Ke : Imaam Shafee Ne Kaha : Muhdasaat ( Bidaat ) Ki 2 Qismein Hai : Yani Jo Deen Me Naya Kaam Nikala Gaya Us Ki 2 Qismein Hai, Deen Me Jo Aisa Naya Kaam Nikala Gaya Jo Kitaab O Sunnat Ya Aasar Sahaaba Ya Ijma Ke Khilaf Ho To Woh Bidate Zalaal ( Gumrahi ) Hai Aur Deen Me Aisa Naya Kaam Nikala Gaya Ho In Me Se ( Quran O Sunnat O Sahaba Ke Farameen O Ijma ) Ke Mukhalif ( Khilaf ) Na Ho To Woh Bidate Ghair Mazmoomah ( Buri Bidat Aur Gumraahi Nahi ) Hai.²⁶

( Fathul Bari, Vol : 17, Page : 135, Kitaab : 96, Baab : 2, Zere Hadees : 7275-7288, Dare Taibah, Riyadh. )

Ulamaye Deen Ne Bidat Ki Tafseel Me 5 Qismein Tak Bayan Kiye Hai, Imaam Navavi Ne Aur Yahi Imaam Ibne Hajar Asqalani Ne Bhi Us Taqseem Ka Zikr Kiya. 

Sahi Muslim Ki Hadees Me Hai : 

Allah Ke Aakhrib Nabi ﷺ Farmate Hai :  Jo Islaam Me Kisi Acche Tariqe Ko Raaij Karega To Usko Apne Raaij Karne Ka Bhi Sawaab Milega Aur Un Logon Ke Amal Karne Ka Bhi Jo Uske Bad Us Tariqe Par Amal Karte Rahenge Aur Amal Karne Walon Ke Sawaab Me Koyi Bhi Kami Bhi Na Hogi, Aur Jo Mazhabe Islaam Me Kisi Bure Tariqe Ko Raaij Karega To Us Shakhs Par Uske Raaij Karne Ka Bhi Gunaah Hoga, Aur Un Logon Ke Amal Karne Ka Bhi Gunaah Hoga Jo Us Ke Bad Us Tariqe Par Amal Karte Rahenge, Aur Amal Karne Walon Ke Gunaah Me Koyi Kami Na Hogi.²⁷

( Sahi Muslim, Kitabe Zakat, Baab : 21/22, Page : 462, Hadees : 1017 ( 2240 ), Darul Fikr, Beirut. )

Aur Bukhari Shareef Me Hazrate Umar رضى اللّٰه تعالى عنه Ne Taraveeh Ki Jamaat Ke Hawale Se Farmaya : Ye Acchi Bidat Hai.²⁸

( Sahi Bukhari, Kitab : 31 ( Taraveeh ), Baab : 1, Page : 482, Hadees : 2010, Dar Ibne Kaseer. )

Imaam Badruddin Aini Is Riwayat Ke Tehat Farmate Hai : Bidat Ki 2 Qismein Hai, Agar Woh Nek Kaam Sharan Nek Ho To Woh Bidate Hasanah ( Acchi Bidat ) Hai Aur Agar Woh Nek Kaam Sharan Bura Ho To Bidate Qabeeha Hai.²⁹

( Umdatul Qari, Vol : 11, Page : 178, Ilmiyah, Beirut. )

Har Naya Kaam Hi Agar Bura Hai To In Ahadees Ka Kya Matlab, Bidat Ke Baare Me Maloomaat Aur Ahadees Ka Matlab Hazrate Umar رضى اللّٰه تعالى عنه Se Zyada Kaun Jaanta Hai ? Jab Woh Khud Bidat Ka Lafz Istemal Karke Ek Kaam Ko Accha Farma Rahe Hai, To Maanna Padega Ke Har Nayi Cheez Buri Bidat Hi Nahi Hoti.

Yahi Dekh Liya Jaaye Ke Jo Message Bheja Gaya, Us Se Deen Ki Khidmat Maqsood Thi, Kya Ye Bidat Nahi ? Ye Kis "Sahi" Hadees Se Sabit Hai ? Kya Isko Deen Ke Liye Samajh Ke Nahi Kiya Jaaraha ? Kya Ye Buri Bidat Nahi ?.

Yahan Tak Ke Qurane Kareem Ke Eraab Waghaira, Ilme Sarf O Nahv Ki Eejaad O Taleem, Masajid Ki Zaibaish O Aaraish, Quran Ka Jama Karna, Ahadees Ki Mustaqil Abwaab O Isnaad Ke Saath Kutub Including Bukhari Wa Muslim ( Ye Kitabein To Quroone Oola Ke Bad Likkhi Gayi! ), Ilme Asmaaurrijaal Aur Jarh O Tadeel ( Jo Rawiyon Ke Halat Aur Unke Zaeef Ya Siqah Waghaira Hone Ke Mutalliq Uloom Hai ), Aur Khud Yahi Sahi Hadees Ki Rat Kisi Sahi Hadees Se Sabit Nahi. Ye To Bad Walone Banaye, Rawiyon Ke Etebaar Se Hukm Lagaana Shuru Kiya Gaya Ke Kaunsi Hadees Sahi Hai Aur Kaunsi Hadees Zaeef Hai Waghaira.

Ilawa Iske Hamare Subh O Shaam Se Lekar, Kisi Ki Paidaish Se Wafaat Tak Beshumaar Aise Kaam Insan Deen Ke Naam Par Karta Hai Jo Kisi Sahi Hadees Se To Kya Zaeef Hadees Me Bhi Bayan Nahi Huwi, Khud Yahi Eteraz Karne Walon Ke Pata Nahi Kitne Institutes Honge, Sab Ko Bidati Bidati Keh Kar Salaana Kitne Programs Khud Makhsoos Tareekhon Me Karte Honge, Is Ka Agar Jayiza Liya Jaaye To Baat Khul Jayegi Ke Woh Khud Bhi Sar Ta Pa Bidaat Me Doobe Huwe Hai, To Sab Se Bade Bidati Wahi Hai.

____________________

1) Nimatul Bari : 3/293. ( 13/485 & 16/883 )

2) Tibyanul Quran : 10/744.

3) Sharhe Muslim : 2/468.

4) Miraat-ul-Manajeeh : 2/284.

5) Tibyanul Quran : "

6) Fatawa Razaviyyah : 5/484.

7) Shabe Baraat Ke Fazail O Dalail : 61-62.

8) Khazainul Irfan.

9-10) Tafseer Durre Mansoor : 5/1099.

11) Siratul Jinan : Dukhaan 4-5.

12-13) Khazainul Irfan.

14) Siratul Jinan : Muminoon 99-100.

15-17) Fatawa Razaviyyah : 9/653-654.

18) Sharhussudoor : 403 

19) Sharhussudoor : 423

20) Sharhussudoor : 415

21-22) Shabe Barat Ke Fazail O Dalail : 141-143.

23) Nimatul Bari : 4/488.

24) Nuzhatul Qari : 1/421.

25) Miraat-ul-Manajeeh : 2/278.

26) Nimatul Bari : 16/303-304.

27) Anwaarul Hadees : 91-92.

28-29) Nimatul Bari : 4/528