Ghairullah Ke Naam Ka Janwar Shirk ? Yaqoob Jamai Ko Jawab!!

 {Part 1}

Video Me Kaha Jaaraha Hai Ke : "Hamare Nabi Ke Qabr Ka Sajdah Jayiz Nahi"

1) Is Se Inkaar Nahi Ke Ghairullah Ko Sajdah Jayiz Nahi, Kyunke Is Muamle Me Kayi Ahadees Maujood Hai, Jisme Saaf Saaf Ghairullah Ko Sajdah Karne Se Mana Kiya Gaya....Hamare Ulama Ne Kabhi Sajdah Karne Ko Jayiz Nahi Kaha, Khaas Kar Ala Hazrat Ke Jin Ki Wajah Se Ahle Sunnat Ko Barelvi Kaha Jaata Hai, Unhone Kayi Jagah Is Baat Ko Likkha Hai, Woh Farmaate Hai Ke : 

2) Sajdah Kisi Qism Ka Shariate Muhammadiyah Me Ghaire Khuda Ke Liye Jayiz Nahi : Fatawa Razaviyyah Jild 22 Safha 413, Raza Foundation.

3) Ghair Ko Sajdah Bila Shubah Haram Hai : Fatawa Razaviyyah 22/412 FR.

Deegar Mazaron Ki Baat Apni Jagah Woh To Madina Tayyiba Ke Muamle Me Ye Farmaate Hai Ke : 

4) Rozaye Anwar Ka Tawaaf Karo Na Sajdah, Na Itna Jhukna Ke Rukoo Ke Barabar Ho, Rasoolullah ﷺ Ki Tazeem Un Ki Itat Me Hai.

( Fatawa Razaviyyah, Jild 10, Safha 776. ) ( Bahare Shariat 1/1228. )

Balke Is Masale Me Unhone, Ek Mukammal Risala Kitaab Likkha Jisme Ye Sabit Kiya Quran O Hadees Ki Roo Se Ke Ghairullah Ko Sajdah Karna Jaayiz Nahi..!

______________

Aur Kaha Jaane Laga Ke : "Aksar Kalimah Padhne Wale Mushrik Ke Mushrik Hi Rahenge"

Suraye Yusuf Ki Aayat 106 Ka Asl Tarjama Kuch Aise Hai : Aur Un Me Aksar Woh Hai Ke Allah Par Yaqeen Nahi Laate Magar Shirk Karte Huwe.

Is Aayat Ki Tafseer Yani Khulasa Dekhiye :

1) Imaam Qurtubi Jin Ki Wafaat 671 Hijri Me Huwi ( Yani Ab Jab Ke 1444 Hijri Ka Saal Hai, Is Hisab Se Unke Wisaal Ko 773 Saal Guzar Gaye ) In Ki Tafseere Qurtubi Ek Mashhoor Kitaab Hai, Woh Apni Is Kitaab Me Suraye Yusuf Ki Isi Aayat 106 Ka Tafseer ( Explanation ) Bayan Karte Huwe Likhte Hai Ke : 

• Ye ( Aayat ) In Logon Ke Baare Me Naazil Huwi ( Utri ) Jinhone Is Baat Ka Iqraar Kiya ( Yani Ye To Maana ) Ke Allah تعالی Un Ka Aur Sab Ashiya ( Cheezon ) Ka Khaaliq ( Paida Karne Waala Hai ) Jabke Woh Buton Ki Pooja Karte Hai, Ye Hazrate Hasan Basri, Mujaahid, Aamir Shabi رحمة اللّٰه عليهم Aur Aksar Mufassireen Ka Qaul Hai.

• Aur Hazrate Hasan Se Ye Bhi Marwi Hai Ye Ahle Kitaab ( Yahudyon Aur Eesayiyon Ke Baare Me Naazil Huwi ) Hai....( Jo ) Allah تعالی Ki Zaat Par Iman Laate Hai Aur Muhammad ﷺ Ki Takfeer Karte Hai ( Yani Huzoor ﷺ Ko Nahi Maante ) To Unke Imaa Sahi Nahi.

• Hazrate Ibne Abbaas رضى اللّٰه تعالى عنهما Ne Farmaaya Ye Aayat Mushrikeene Arab Ke Talbiyah Ke Baare Me Naazil Huwi Hai.

• Ek Qaul Ye Bhi Hai Ke Ye Aayat Munafiqeen Ke Baare Me Naazil Huwi.

( Makhooz Az : Tafseere Qurtubi, Jild 5, Safha 287, Zere Tafseer Suraye Yusuf : 106, Ziaul Quran Publications. )

Mushrikeene Arab Ka Talbiyah Kya Tha, Is Hawale Se Sahi Muslim Me Hadees Hai : 

Hazrate Ibne Abbas رضى اللّٰه تعالى عنهما Bayan Karte Hai Ke Mushrikeene Makkah : Labbaika Laa Shareeka Lak, Kehte To Rasoolullah ﷺ Farmate Hai : Tumhe Azaab Ho, Is Se Aage Na Kaho, Lekin Mushrikeen Iske Bad Kehte : Magar Ek Shareek Hai...

( Sahi Muslim, Kitabul Hajj, Baab : 3, Safha 549, Hadees : 1185 ( 2704 ), Darul Fikr. )

SMU : 2/25.

Yun Us Zamane Me Arab Ke Rehne Wale Mushrik Pehle Allah Ko Ek Bataate The Phir Aur Bhi Khuda Hone Ki Baatein Karte The!. Allah Ki Panah.

2) Aur Tafseere Madarik Jiske Likhne Wale Imaam Nasafi Hai, Jin Ki Wafaat Huwi 701 Hijri Me Huwi ( Yani Ab Tak 743 Saal Huwe ) Woh Isi Suraye Yusuf Aayat 106 Ke Baare Me Likhte Hai : 

Aur Un Me Se Zyada Tar Log Allah Par Iman Nahi Laate Magar Shirke Woh Mushrik Rehte Hai, Yani Mushrikeene Arab Me Se Zyadah Log Allah تعالی Par Iman Nahi Laate Agarche Woh Allah تعالی Ki Zaat Ka Iqraar Karte Hai ( Yani Ye Maante Hai ) Ke Beshak Unhe Usi Ne Paida Kiya Hai, Neez Tamaam Aasmaanon Aur Tamaam Zameenon Ka Wahi Paida Karne Waala Hai, Lekin Woh Log Buton Ki Ibadat O Parastish ( Pooja ) Karke Allah تعالی Ke Saath Shirk Karte Hai, Chunanche Jamhoor Mufassireen Is Par Muttafiq Hai Ke Ye Ayate Mubarakah Yaqinan Mushrikeen Ke Bare Me Naazil Huwi Hai.

( Aage Likhte Hai ) Khaalis Tauheed Yahi Hai Jiske Ahle Sunnat Qail Hai Aur Woh Ye Hai Ke Allah تعالی Ke Siwa Koyi Khaaliq Nahi.

( Tafseere Madarik, Jild 2, Safha 202, Zere Tafseer Suraye Yusuf : 106, Fareed Book Stall. )

To Ab Suwal Ye Hai Ke Jab Ye Aayat Hai Buton Ki Pooja Karne Waalon Ke Baare Me Utri To Is Aayat Ka Gyarhvi Karne Walon Se Kya Lena Dena Hai ? Kyu Zabardasti Gyrahvi Karne Walon Ko Mushrik Kaha Jaaraha Hai ? Kyu Gyarhvi Me Bakra Kaatne Walon Par Is Aayat Ko Fit Kiya Jaaraha Hai ? Aur Phir Ye Bhi Suwal Qaim Hota Hai Ke Aayat Me Kalimah Padhne Ki Baat Kahan Ki Gayi Hai ?? Kyu Logon Ko Jhoot Bataya Jaaraha Hai ? Bas Kuch Haya Karna Chaahiye.

____________

Aise Hi Kaha Gaya Ke "Idhar Masjid Gaye To Allah Ka Sajdah Udhar Dargah Me Gaye To Qabr Walon Ka Sajdah" 

Jaisa Ke Maine Arz Kardiya Ke Sajdah Jayiz Nahi, Ab Agar Koyi Sajdah Karta Hi Hai To Use Direct Mushrik Keh Dena Sarasar Galat Baat Hai!

Sajdah 2 Qism Ka Hota Hai, Ek Sajdaye Tazeemi Hai Hai Yani Kisi Ki Tazeem Aur Respect Ke Liye Sajdah Karna Ye Hamare Liye Ab To Haraam Hai Magar Pehle, Doosra Sajdaye Ibadat Hai Yani Kisi Ko Khuda Samajh Kar, Ibadat Ke Laaiq Jaan Kar Sajdah Karna, Ye Kufr O Shirk Hai.

Sajdaye Tazeemi Agli Shariaton Me Yani Huzoor ﷺ Ki Duniya Me Tashreef Aawari Se Pehle Nabiyon Ke Zamane Me Jayiz Tha, Iski Daleel Quran Me Hai :

1) Para 1, Suraye Baqarah : 34 Me Hai : Aur Yaad Karo Jab Ham Ne Firishton Ko Hukm Diya Ke Adam Ko Sajdah Karo To Iblees Ke Ilawa Sab Ne Sajdah Kiya, Us Ne Inkaar Kiya Aur Takabbur Kiya Aur Kaafir Hogaya.

Aur Para 13 Suraye Yusuf Aayat No 100 Me Irshaad Huwa Ke : "Aur Usne Apne Maa Baap Ko Takht Par Bithaya Aur Sab Uske Liye Sajde Me Girgaye Aur Yusuf Ne Kaha : Ae Mere Baap! Mere Pehle Khwaab Ki Tabeer Hai, Beshak Use Mere Rab Ne Saccha Kardiya."

Ye Wahi Khwab Hai Jiska Zikr Para 12 Suraye Yusuf Hi Ki Aayat 4 Me Huwa Ke : "Yaad Karo Jab Yusuf Ne Apne Baap Se Kaha Ae Mere Baap, Maine Gyarah Sitaaron Aur Suraj Aur Chand Ki Dekha, Maine Unhe Apne Liye Sajdah Karte Huwe Dekha."

Tafseere Qurtubi Me Pehli Aayat Ke Baare Me Hai Ke : Malaikah Ke Hazrate Aadam علیہ السلام Ke Hazrate Aadam علیہ السلام Ke Saamen Sajdah Karne Ki Kaifiyyat Me Ikhtelaaf Hai, Jabke Is Par Ittefaaq Hai Ke Ye Sajdah Ibadat Na Tha.

( Tafseere Qurtubi, Jild 1, Safha 307, Zere Tafseer : Suraye Baqarah Aayat 34. )

Aur Doosri Aayat Ke Baare Me Hai : Woh Sajdah His Bhi Tariqe Se Tha Sirf Salaam Ke Taur Par Tha Sajdaye Ibadat Nahi Tha, Qatadah Ne Kaha : Un Ke Nazdeek Badshahon Ka Yahi Salaam Hota Tha..

( Tafseere Qurtubi, Jild 5, Safha 280, Zere Tafseer : Suraye Yusuf Aayat : 100. )

2) To Jo Har Sajdah Karne Wale Ko Mushrik Aur Har Tarah Ke Sajde Ko Shirk Keh Dete Hai, Woh In Sajdon Ke Baare Me Kya Kehte Hai ? Manna Padega Ke Ye Sajdaye Tazeemi Tha Jo Kiya Gaya, Ye Farq Na Kiya Jaaye To Bohut Bada Masalah Khada Hoga!

( Yahan Ye Baat Bhi Yaad Rakhna Chaahiye Ke Shirk Kisi Zamen Me Jayiz Nahi Tha! Khud Isi Suraye Yusuf Ki Aayat No 38 Me Hazrate Yusuf علیہ السلام Ne Qaidiyon Ko Yun Nasihat Ki : "Hamare Liye Hargiz Jaayiz Nahi Ke Ham Kisi Cheez Ko Allah Ka Shareek Thehraaye." )

Isi Liye Ala Hazrat Bhi Likhte Hai Ke : 

Sajdah 2 Qism Hai, Sajdaye Ibadat O Sajdaye Tahiyyat. Sajdaye Ibadat Ghaire Khuda Ke Liye Kufr Hai Aur Sajdaye Tahiyyat Ghaire Khuda Ke Liye Haraam Magar Kufr O Shirk Nahi, Ke Agli Shariaton Ke Jayiz Tha Aur Kufr O Shirk Kabhi Jayiz Nahi Hosakta.

( Fatawa Razaviyyah, Jild 22, Safha 423, Mulakkhasan. )

Khulasa Ye Hai Ke Agar Koyi Sajdah Kar Raha Hai Apni Jahalat Ki Wajah Se To Woh Tazeem Ke Liye Kar Raha Hoga!, Use Uski Niyyat Jaane Beghair Kyu Mushrik Keh Kar Islaam Se Nikaala Jaaraha Hai!? 

_______________

{Part 2} 

Aur Phir Kaha Jaraha Hai Ke "Udhar Bakr Eid Aaye To Allah Ke Waste Qurbani Idhar Rabiul Akhar Aaye To Mhaboo Subhani Ke Naam Se Bakra Zaban Karte" Aur Kaha : "Allah Ke Ilawa Kisi Ke Liye Janwar Zabah Karna Jayiz Nahi."

Iska Jawab Ye Hai Ke :

1) Ye Baat Clear Honi Chaahiye Ke Ghaire Khuda Ke Naam Par Janwar Zabah Hone Ka Matlab Ye Hai Ke Koyi Bimsillahi Allahu Akbar Ki Jagah Par Kisi Ghaire Khuda Ka Naam Lekar Zabah Kare....! Janwar Lene Ke Bad Ye Fula Ka Bakra Kehen Se Janwar Haram Aur Ye Bolna Shirk Nahi Hojaata!, Balke Janwar Ko Bismillahi Allahu Akbar Keh Kar Zabah Karne Se Pehle Koyi Ghairullah Ka Naam Le Le, Ya Bismillahi Allahu Akbar Keh Kar Zabah Karne Ke Bad Koyi Ghairullah Ka Naam Le Le Tab Bhi Janwar Haram Nahi Hojaata!

Sahi Muslim Me Hadees Hai Ke Mendha : "Qurbani Ke Liye Hazir Kiya Gaya ( Laaya Gaya ) Huzoor ﷺ Ne Farmaaya : Aayisha Churi Laavi, Phir Farmaya : Use Patthar Par Tez Karlo Phir Huzoor ﷺ Ne Churi Li Aur Mendhe Ko Litaaya Aur Use Zabah Kiya, Phir Kaha : Ilahi Tu Isko Muhammad (ﷺ) Ki Taraf Se Aur Unki Aal Aur Ummat Ki Taraf Se Qabool Farmaa.

( Sahi Muslim, Kitabul Azaahi, Baab : 3, Hadees : 1967 ( 4984 ), Safha 992. )

BS

Aisi Hi Ek Aur Hadees Jo Imaam Hakim Ne Apni Mustadrak Ne Riwayat Kiya, Hadees 1716.

Aur Sunane Abu Davood Me Ek Riwayat Hai Ke Zabah Karne Ke Din Jab :

"Un ( Mendhon ) Ka Munh Qible Ko Kiya Ye Padha :" 

( Jiska Tarjama Ye Hai )

Maine Apna Munh Uski Taraf Kiya Jisne Aasmaan Aur Zameen Banaaye Millate "Ibrahimi" Par Ek Usi Ka Hokar, Aur Maj Mushrikon Me Nahi. Beshak Meri Namaz Aur Meri Qurbaniyan Aur Mera Jeena Aur Mera Marna Sab Allah Ke Liye Hai Jo RabbHai Saare Jahaan Ka, Uska Koyi Shareek Nahi, Mujhe Yahi Hukm Huwa Hai Aur Maj Musalmaanon Me Hun, Ilahi Ye Teri Taufeeq Se Hai Aur Tere Liye Hi Hai Muhammad (ﷺ) Aur Aap Ki Ummat Ki Taraf Se. "Bismillahi Allahu Akbar" Isko Padh Kar Zabah Farmaaya.

( Sunane Abu Davood, Hadees No : 2795. )

BS

Pehli Hadees Me Aur Doosri Hadees Ke Mutabiq Zabah Karne Se Pehle Aur Bad Me Huzoor ﷺ Ka Naam Liya Gaya, Ahle Bait Aur Is Ummat Ka Aur Hazrate Ibraheem علیہ السلام Ka Bhi Naam Liya.

Ye Hadees Hamari Daleel Bhi Hai Ke Doosron Ki Taraf Se Zabah Kiya Bhi Jasakta Hai.

2) Ghause Pak Ke Liye Bakra Kehne Se Shirk Hojaata Hai To Suwal Hai Ke : Walime Ka Bakra, Nikah Ka Potla, Ab Walima Kiska Nikah Kis Ki, Bakr Eid Ke Dinon Me Bakra Laaye Aur Koyi Pooche Kis Ka Hai, Kya Ye Kehna Shirk Hai Ke Mera Hai ? Padosi Ka Hai ? Koyi Apne Bacchon Ke Aqiqe Me Potle Kaate To Kahe Ke Maine Apne Bacche Ke Liye Potle Kate To Shirk Hojaayega ?? Akhir Shirk Kya Aise Bhi Hota Hai ? Ye Zyadati Hai, In Cheezon Ka Shirk Se Koyi Lena Dena Hi Nahi, Yahan Matlab Bilkul Saaf Hai, Ke Zabah Allah Ke Liye Hai Magar Ye Kaata Kisi Ki Taraf Se Hai, Ya Qurbani Dene Wala Jo Tha Uska Naam Potle Ke Naam Ke Saath Lag Gaya Bas....

1) Rasoolullah ﷺ Ne Farmaaya : Allah Ke Nazdeek Sab Se Zyada Pasandeedah Roze Hazrate Davood علیہ السلام Ke Roze Hai, Hazrate Davood Aadhi Raat Tak Aaram Karte The Aur Tihaayi Raat Me Qiyaam Karte The, Phir Raat Ke Chate Hisse Me Aaram Karte The Aur Ek Din Rozah Rakhte The Aur Ek Din Iftaar Karte The.

( Sahi Bukhari, Kitab 19 : Tahajjud, Baab 7, Safha 274, Hadees : 1131, Dar Ibne Kaseer. )

NB : 3/280.

Ab Ye Kya Hai ? Ghause Pak Ka Bakra Kehna To Shirk Hosakta Hai, Magar Davood عليه السلام Ki Namaz Kehna Shirk Nahi ???

2) Hazrate Abu Hurairah رضى اللّٰه تعالى عنه Ne ( Kuch Logon Se ) Farmaaya : Tum Se Koyi Is Baat Ka Zamin Banta Hai Ke Masjide Asshaar Me Mere Liye Do Chaar Rakatein Padh De Aur Keh De Ke Ye Namaaz Abu Hurairah Ki Hai ( Abu Hurairah Ke Liye Hai ), Maine Apne Mahboob Abul Qasim ﷺ Se Suna Ke Allah تعالی Qiyamat Ke Din Masjide Asshaar Se Aise Shaheed Uthayega Ke Un Ke Siwa Shudaye Bade Ke Saath Koyi Na Khada Hoga.

( Sunane Abu Davood, 4308. )

( Mishkaat Shareef, Hadees : 5434. )

( Ziaul Hadees : 90 )

Ghause Pak Ke Liye Bakra Zabah Karna Shirk Haina ? Phir Ye Hazrate Abu Hurairah Ke Liye Namaz Padhna Kaise Tauheed Hai ? Namaaz To Zabah Karne Se Badi Ibadat Hai! Ye To Aur Sakht Shirk Hona Chaahiye Un Ke Mutabiq?? Woh Saaf Saaf Keh Rahe Hai Ke Mere Liye Namaz Padho Padhne Ke Bad Kaho Ye Namaz Abu Hurairah Ke Liye Hai!! 

Agarche Hosakta Hai Ke Ye Riwayat Kuch Isnadi Haisiyyat Se Zaeef Ho, Magar Suwal Ye Hai Ke Imaam Abu Davood Jo Bohut Bade Muhaddis Hai Unhone Ise Apni Kitaab Me Shamil Kyu Kiya ?? Siha Sitta Ahadees Ki 6 Mashhoor Bharose Mand Kitaabon Me Jo Ek Kitaab Mani Jaati Hai, Usme Ye Hadees Kyu Likkhi Gayi Hai ?? Agar Ye Hadees Durust Nahi Hai To Woh Likhte Hi Kyu ? Aur Phir Iske Likhne Bad Unhone Kuch Nahi Kaha Balke Woh Farmate Hai : Ye Masjid Nehar Ke Qareeb Hai. Bas!, Kya Koyi Keh Sakta Hai Ke Sunane Abu Davood Jo Hadees Ki Bohut Badi Kitab Hai Usme Shirk Sikhaya Jaaraha Hai ??

3) Hazrate Sad رضى اللّٰه تعالى عنه Ki Walidah Ka Jab Inteqaal Huwa, Unhone Huzoore Aqdas ﷺ Ki Khidmat Me Arz Ki, Ya Rasoolallah ﷺ Sad Ki Maa Ka Inteqaal Hogaya, Kaunsa Sadqa Afzal Hai ? Irshad Farmaya : Pani, Unhone Kunva Khoda Aur Ye Kaha Ke Ye Sad Ki Maa Ke Liye Hai.

( Sunane Abu Davood, 1681. )

BS : 3/642

Ibadat Koyi Bhi Ho Allah Ke Liye Honi Chaahiye! Aur Sadqa Ibadat Hai Kaise Ye Ghairullah Ke Liye Shirk Nahi!!?? Aur Maze Ki Baat Ye Hai Ke Isko Ahle Hadees Aur Salafi Kehlane Walon Ke Sheikh Nasiruddin Albani Sahab Hasan Daraje Ki Hadees Bata Rahe Hai! Ye Sunane Abu Davood Chapi Hai Jeddah Riyadh Se! Us Ke Page No 291 Par Ye Hadees Likkhi Hai, Aur Saath Me Hasan Likkha Gaya, Yani Isko Jhoot Kehne Ke Saare Darwaze Band Kardiye Gaye Hai! 

In Riwayat Ko Saamne Rakh Kar Ye Manna Hi Padega Ke...!

Ye Jo Kehte Hai Ke Ye Ghaus Pak Ka Bakra Hai, Ye Ghause Pak Ke Liye Hai, Ye Sirf Is Liye Hai Jaise Hazrate Abu Hurairah رضى اللّٰه تعالى عنه Ki Hadees Aur Hazrate Sad رضى اللّٰه تعالى عنه Ki Hadees Me Hai, Yani Sawab Pahunchana Maqsad Hota Hai, Is Wajah Se Naam Lete Hai

Is Muamle Me Ye Sarasar Bad Gumaani Hai, Ke Ye Allah Ke Ilawa Kisi Aur Ko Khuda Samajh Kar Uske Liye Kaat Te Hai!, Ye Tohmat Hai Musalmanon Par! Aise Logon Ko Zara Khuda Ka Khauf Karna Chaahiye..!

Para 26 Suraye Hujuraat Aayat 12 Me Hai : "Ae Eemaan Walon Bohut Zyada Gumaan Karne Se Bacho, Beshak Koyi Gumaan Gunaah Hojaata Hai."

Aur Sahi Bukhari Shareef Me Hadees Hai, Huzoor ﷺ Ne Farmaya : Gumaan Se Door Raho Ke Gumaan Se Badh Kar Koyi Baat Jhooti Nahi.

( Sahi Bukhari, Kitab 78 : Adab, Baab : 58, Safha 1519, Hadees : 6066, Dar Ibne Kaseer, Beirut. )

FR : 230

Ek Aur Hadees Me Ek Khaas Mauqe Par Huzoor ﷺ Ne Farmaaya Tha Ke :

Tu Ne Us Ka Dil Cheer Kar Kyun Na Dekha Ke Dil Ke Aqeede Par Ittela Paata.

( Sahi Muslim, Kitabul Iman, Baab : 40, Hadees : 96 ( 179 ), Safha 69, Darul Fikr, Beirut. )

FR : 230

Musalmaanon Par Kufr O Shirk Ke Fatwe Lagaana Bohut Badi Jasarat Hai!, Aisa Karna Ahadees Ki Raushni Me Bohut Sakht Kaam Hai!

Huzoor ﷺ Ne Farmaaya : Jis Ne Kisi Mumin Par Kufr Ki Tohmat Lagaayi To Woh Uske Qatl Karne Ki Misl Hai.

( Sahi Bukhari, Kitabul Adab, Baab : 73, Safha 1526, Riwayat : 6105. )

Kisi Musalmaan Ko Kaafir Mushrik Kehne Walon Ko Sochna Chaahiye Ke Woh Aisa Kaam Kar Rahe Hai Jo Qatl Karne Ki Tarah Hai!

Sahi Bukhari Ki Hadees 6103 & 6104 Aur Kayi Ahadees Me Ye Bayan Kiya Gaya Hai, ( Jiska Khulasa Hai ) Ke Jo Kisi Ko Kaafir Kahe Agar Woh Kafir Nahi Hai To Kufr Kehne Wale Par Palat Aayega.!.

Yahan To Baat Shirk Ki Hai!, Aur Shirk To Aur Badtar Cheez Hai! Choti Choti Baaton Par Shirk Shirk Karne Wale Apni Akhirat Kharaab Karte Hai!

Aur Rahi Baat Agar Koyi Aisa Karta Hai, Yani Koyi Yahan Ghause Pak Ka Naam Is Wajah Se Hi Leta Hai Ke Ghause Azam Ki Ibadat Karne Ki Uski Niyyat Hai To Aisa Shakhs Waqayi Mushrik Hai, Ala Hazrat Bhi Farmaate Hai :

Han Agar Koyi Jaahil Ajhal Ye Nisbate Izafat Baqasde Ibadate Ghair Hi Karta Hai To Uske Kufr Me Shak Nahi.

( Fatawa Razaviyyah, Jild 20, Safha 273. )

Magar Aise Kaun Karta Hai ? Sab Jaante Hai Ke Ghause Azam Ek Allah Ke Wali Hai, Koyi Unhe Nabi Bhi Nahi Samajhta, Ye To Samajh Se Aage Ki Baat Hai Ke Koyi Unhe Khuda Samajh Kar Un Ki Ibadat Kare! Aisa Hargiz Nahi Hota. Phir Bhi Agar Koyi Ek Jahil Se Jahil Shakhs Aisa Karta Mile To Uski Wajah Se Sab Par Ye Baat Thopna Bohut Bada Ilzaam Hai, Aur Ilzaam Lagane Waale Apne Is Fatwe Ke Palatne Se Nahi Bachpayenge.

Aur Akhir Me Baat Huwi Ke Koyi Baqr Eid Me Qurbani Nahi Karte Magar Rabiul Akhir Me Ye Karlete Hai.

Is Me Hamare Ulama Ka Fatawa Bilkul Saaf Hai, Jo Qurbani Karsakta Hai ( Kuch Sharait Ke Saath ) Us Par Qurbani Waajib Hai!, Agar Nahi Karega Gunahgaar Hoga, Jabke Gyarhvi Me Bakra Kaatna Ek Accha Kaam Hai Bas, Jis Ke Chorhne Me Koyi Kisi Tarah Ka Gunaah Nahi. Waise Bhi Hamare Yahan Jo Gyrahvi Karte Hai Unme Bakra Kaatne Waale Bohut Hi Kam Hai, Ye Sabhi Jaante Aur Samajhte Hi Hai Ke Bakra Kaatna Zaroori Nahi. Doosre Alfaaz Me Jitne Sunni Baqr Eid Me Qurbani Dete Hai, Woh Bohut Zyada Hai, Rabiul Akhir Me Bakra Kaatne Waalon Se, Agar Kehne Walon Ko Koyi Ek Do Aise Log Mile Hai To Sab Ko Ek Hi Lakdi Se Haankna Aqlmandi Kisi Tarah Nahi.